စံပယ်ကြွေတဲ့ည

အရင်လိုမမွှေးမြတော့ဘူးရယ်၊

မိုးရေတွေမဟုတ်ဘူး

မျက်ရည်တွေပါကိုကို

အပွင့်လေးတွေဖြူသလောက်

အရွက်တွေဒီလောက်စိမ်းမယ် မထင်ခဲ့မိဘူး၊

သံယောဇဉ်ဆိုတာ

ဝေးသွားရင်ညှိးတတ်ခြောက်တတ်သတဲ့လား

အခုတော့ အဖူးလေးတွေပါ ကြွေ။ ။

မွေးနေ့စကား

အမေ့ရဲ့နာကျင်မှုတွေကို

ငိုသံနဲ့ပြန်အလျော်ပေးခဲ့ပါတယ်

ကမ္ဘာကြီးရဲ့နာကျင်မှုတွေကိုကော

ဘာနဲ့ပြန်အလျော်ပေးရမလဲ

ကျန်ခဲ့မယ့်ပြာတဆုပ်က

မြတ်လေးပန်းရုံလေးတရုံလောက်ကိုတော့

မွှေးပျံ့စေနိုင်မယ်ထင်ပါရဲ့

ရေပွက်ပမာ

ကိုယ့်ဂယက်ကလေးတွေနဲ့ကိုယ်

အလင်းနှစ်တွေဆီခရီးထွက်ခဲ့ကြ

ကျန်းမာပျော်ရွှင်ကြပါစေ။ ။

သူငယ်ချင်းတယောက်ရဲ့ နာရေးသတင်းနဲ့ သူငယ်ချင်းတယောက်ရဲ့ မွေးနေ့အမှတ်တရကြားမှာ ဒီကဗျာကိုရေးပါတယ်။