Friday, March 6, 2009

ခေါင်းစဉ်မပါတဲ့မှတ်စု


အမှောင်ကကြီးစိုးဖို့အားယူနေသည်။ အလင်းရောင်က မှိန်ပြယ်ဖျော့လှီစ၊ အားမရှိတော့။ နေနှင့်ညအကူးအပြောင်းကာလဟုဆိုနိုင်သည်။ အနောက်ဖက်ကောင်းကင်မှာ တိမ်တွေက အရောင်စုံသည်။ ဒါကိုပင် ဆည်းဆာအလှဟု ဖွဲ့ဆိုကြသည်။ တိမ်စွယ်မှာဆီးမီးထွန်းသလိုပင် ဆိုတဲ့စာသားကလေးက ရင်ကိုရိုက်ခတ်လာသည်။ ဒီအချိန်မှာ အကျည်းတန်တွေတောင်လှတယ်ဟုပင် ဆိုလိုက်ကြသေးသည်။ ညက အမှောင်ကိုသာမဟုတ်။ တိတ်ဆိတ်ငြိမ်းအေးမှု၊ ငြိမ်သက်အနားယူမှုတို့ကို ယူဆောင်လာသည်လေ။ တနေ့တာနွမ်းလျမှုတို့ကို အမောဖြေအနားယူခွင့်ရချိန်မဟုတ်လား။ မိသားစုအိမ်အမိုးလေးအောက်မှာ၊ ချစ်သူ့ရင်ခွင်မှာ၊ နွေးထွေးလုံခြုံတဲ့ကိုယ်ပိုင်အိပ်ယာလေးထဲမှာ ညက အားလုံးကိုချော့သိပ်နေသည်။ လက်ဆောင်အိပ်မက်ကလေးများကိုပင် ဝေငှလိုက်သေးသည်။ ကြယ်ပုဝါ လဆံထိုးနှင့် လှသောည ကြင်နာသောညကို ဘာ့ကြောင့် ငြူစူရမှာလဲ၊ မုန်းရမှာလဲကွယ်။ ကြိုဆိုပွေ့ဖက်ရုံသာပေါ့။ ဒီအတွေးကြောင့်ပင် ဆည်းဆာက ပိုလို့လှလာသည်။


အမှောင်ထုတဲ့။ ညရဲ့ နောက်ထပ်အဓိပ္ပါယ်တခုဆိုပါတော့။ ရှည်လျားထူသိပ်တဲ့အမှောင်ထုက ဘ၀တွေကို ခဏသေစေသတဲ့။ ခြောက်အိပ်မက်တွေနဲ့ မောပမ်းစေသတဲ့။ ခရီးရှည်ကြီးတခုကို လမ်းပြနေတဲ့ အဝေးက ကြယ်မှိတ်တုတ်ကလေးတွေကလည်း ပေါ်လိုက်ပျောက်လိုက်။ သစ်ခက်သစ်ရွက်တွေပေါ်မှာ၊ အိမ်အမိုးဓနိလက်အဖျားပေါ်မှာ ဒါဏ်ရာရသားကောင်တကောင်ရဲ့ ရင်မှပွက်တဲ့သွေးစက်သွေးနတွေလို လရောင်က ဖိတ်စင်စွန်းပေနေသည်။ ကမ္ဘာမြေပေါ် တယောက်တည်းစွန့်ပစ်ထားခံရသလို အကြိမ်ကြိမ် ထိတ်လန့်တကြား လန့်နိုးခဲ့ရဘူးသည်လေ။


ညရဲ့ခေါင်းနဲ့ပန်းက ဆည်းဆာထဲငေးမောနေသူတယောက်ရဲ့ အတွေးတွေကို လှိုင်းထနေစေပြန်သည်။ ဘာပဲဖြစ်ဖြစ် ငြင်းဆန်ခွင့်မှ မရှိခဲ့ပဲကွယ်။ ညတွေ ထောင်ပေါင်းများစွာ၊ နေ့တွေထောင်ပေါင်းများစွာ ဖြတ်သန်းခဲ့ရပြီးပြီလေ။ ခြောက်ခြားခဲ့ရ၊ မိန်းမောခဲ့ရ။ ပျောက်ဆုံးခဲ့ရ၊ ရှာဖွေတွေ့ရှိခဲ့ရ ဆိုပါတော့။ ကြာတော့လည်း ညဆိုသည် လာချိန်တန်လာ၊ သွားချိန်တန်သွားရသည့် ဧည့်သည်တဦးပဲမဟုတ်လား။ ဘာ့ကြောင့် ရင်ဖိုနေမည်လဲ။ အခုတော့ ဆည်းဆာနှင့် အာရုဏ်ဦးကြားက စီးနေကျရထားလေးတစင်းပေါ်မှာ အချစ်တွေ အမုန်းတွေအစား ပန်းပွင့်တွေကိုသာ တင်ဆောင်သွားပါတော့မည်။ သင်းတပျံ့ပျံ့ဖြင့် ခုတ်မောင်းပါစေလေ။


ကွေ့ကောက်သောမြေနီလမ်းကလေးအတိုင်း။ ဘေးမှာ အဖေါ်မပါ။ တွေ့ခဲ့တဲ့လူတွေကိုလည်း မမှတ်မိ။ ဒီအချိန်က ညီအကိုမသိတသိမဟုတ်လား။ ကိုယ်ပိုင်အခန်းကလေးထဲရောက်တော့ ခလုတ်တွေအားလုံးကို လိုက်ဖွင့်သည်။ ခန်းဆီးလိုက်ကာစတွေကိုချသည်။ စားပွဲပေါ်က ဖတ်လက်စစာအုပ်ကို ကောက်ကိုင်လိုက်သည်။ ပြီးတော့ သီချင်းတစကို ခပ်ဖွဖွလေးညည်းသည်။ စပယ်ဖြူတွေတောင်ပွင့်ပြီကွယ်။

8 comments:

ညိမ်းညို said...

ဆရာ
စာလာဖတ်ပါတယ်

MANORHARY said...

အခုတော့ ဆည်းဆာနှင့် အာရုဏ်ဦးကြားက စီးနေကျရထားလေးတစင်းပေါ်မှာ အချစ်တွေ အမုန်းတွေအစား ပန်းပွင့်တွေကိုသာ တင်ဆောင်သွားပါတော့မည်။ သင်းတပျံ့ပျံ့ဖြင့် ခုတ်မောင်းပါစေလေ။ ...........
........................
....................
အင်း..
အဲလိုလေးပဲ
စိတ်ချမ်းသာမယ်ထင်တယ်နော်
ခက်တာက
အဲလိုနေဖို့ကြိုးစားရပြန်ဦးမှာပဲ

အောင်သာငယ် said...

စံပယ်ပွင့်ပြီ မောင် ...

အဲ သီချင်းလေး ပြန်သတိရသွားတယ်...

ဆောင်းယွန်းလ said...

ပူလွန်းတဲ့နွေမှာလေ အေးချမ်းသွားတယ်
စံပယ်ဖြူတွေတောင် ပွင့်ပြီကွယ်.....

ကိုအောင်(ပျူနိုင်ငံ) said...

အကို ရေးထားတာ အရမ်းကောင်းတယ်၊ အမြဲအားပေး
လျက်ပါ။

တန်ခူး said...

လှတဲ့ည
အကျည်းတန်တဲ့ည
ဘယ်အရာမှ ရွေးချယ်လို့ မရတဲ့ ဘ၀ထဲမှာ
အလိုက်သင့်စီးမျောရင်း ငြိမ်းချမ်းစွာနေတတ်အောင်
ခေါင်းစဉ်မပါတဲ့မှတ်စုလေးက တိုးတိုးလေးပြောနေတယ်…
ကျေးဇူးပါ…
ကျွန်မအိမ်မှာတော့ စံပယ်ဖြူတွေ တကယ်ပွင့်နေတယ်…
ရနံ့ ရောအဆင်းပါ ကြိုက်လွန်းလို့  ပျိုးထားတာပါ…

သက်ဝေ said...

ခံစားတတ်သူတွေရဲ့
ညတွေတိုင်းဟာ အလှတွေ ဝိုင်းဝိုင်းလည်နေပါတယ်...
ညကို အမြတ်တနိုး ချစ်တတ်တဲ့သူ တစ်ယောက်အတွက် ည ဆိုတာ ခေါင်းစဉ် ပါစရာမလိုဘူး လို့ ခံစားရပါတယ်...
မှတ်စုလေးအတွက် ကျေးဇူးပါ...

မျက်မှန်လေး said...

လာလည်ပါသည်။
pls visit to my site :

http://myatmhanlay.blogspot.com