မီးသွေး

လောင်ကျွမ်းထားပြီးသား

နောက်ထပ်ရဲရဲ တောက်လောင်အုန်းမယ့်

ပုန်းနေတဲ့မီးခဲ

မည်းမည်းသဲသဲပေမယ့်

ပြာတော့မကျသေးဘူးလေ။ ။

စစ်

တယောက်ကိုတယောက်တည့်တည့်ချိန်ပစ်ကြ

ဘဝတွေပေးခဲ့ပြီး

ဘာပြန်ရမှန်းမသိလိုက်ဘူး

သေနတ်ခလုတ်ပေါ်မှာ

ငြိမ်းချမ်းမှုကိုရှာသတဲ့

လွတ်မြောက်မှုကိုရှာသတဲ့

အမှန်တရားကိုရှာသတဲ့။

မချိုးရသေးတဲ့ပြောင်းခင်းကြီးတွေကို ထားပစ်ခဲ့ရ

မြေးမလေးရဲ့ဗလာစာအုပ်ထဲမှာ

အရုပ်တွေကို အနီရောင်ခြယ်ထားရဲ့

မြစ်ထဲမှာ

စစ်ပွဲရဲ့ရေစီးသံ။

အပြန်လမ်းက

တဘက်ကမ်းမှာကျန်ခဲ့ပြီ။ ။

၀၃၊ ဇန်နဝါရီ၊ ၂၀၁၁

နှစ်သစ်

မနက်မိုးလင်းတော့

၂၀၁၀ ကအမူးတွေ

၂၀၁၁ ထဲပါလာတယ်၊

တကယ်က

၁၂ နာရီရဲ့ဟိုဘက်မှာ

ဘာမှ မထားပစ်ခဲ့နိုင်ဘူး၊

၁၂ နာရီရဲ့ဒီဘက်မှာလည်း

၁၂ ထပ်တိုက်ပေါ်က ခုန်မချရဲသေးဘူး။

9:15, 1, Jan. 2011

Maesod

စံပယ်ကြွေတဲ့ည

အရင်လိုမမွှေးမြတော့ဘူးရယ်၊

မိုးရေတွေမဟုတ်ဘူး

မျက်ရည်တွေပါကိုကို

အပွင့်လေးတွေဖြူသလောက်

အရွက်တွေဒီလောက်စိမ်းမယ် မထင်ခဲ့မိဘူး၊

သံယောဇဉ်ဆိုတာ

ဝေးသွားရင်ညှိးတတ်ခြောက်တတ်သတဲ့လား

အခုတော့ အဖူးလေးတွေပါ ကြွေ။ ။

မွေးနေ့စကား

အမေ့ရဲ့နာကျင်မှုတွေကို

ငိုသံနဲ့ပြန်အလျော်ပေးခဲ့ပါတယ်

ကမ္ဘာကြီးရဲ့နာကျင်မှုတွေကိုကော

ဘာနဲ့ပြန်အလျော်ပေးရမလဲ

ကျန်ခဲ့မယ့်ပြာတဆုပ်က

မြတ်လေးပန်းရုံလေးတရုံလောက်ကိုတော့

မွှေးပျံ့စေနိုင်မယ်ထင်ပါရဲ့

ရေပွက်ပမာ

ကိုယ့်ဂယက်ကလေးတွေနဲ့ကိုယ်

အလင်းနှစ်တွေဆီခရီးထွက်ခဲ့ကြ

ကျန်းမာပျော်ရွှင်ကြပါစေ။ ။

သူငယ်ချင်းတယောက်ရဲ့ နာရေးသတင်းနဲ့ သူငယ်ချင်းတယောက်ရဲ့ မွေးနေ့အမှတ်တရကြားမှာ ဒီကဗျာကိုရေးပါတယ်။