စစ်နဲ့ ငြိမ်းချမ်းရေး (၁)
- - - - - - - - - - - - - - - - -
စစ်ပွဲက အကင်းမသေသေးဘူး၊
ငြိမ်းချမ်းရေးဆိုသည်
လူကြိုက်များသောမိတ်ကပ်မျှသာ
မဖြစ်သင့်၊
ပြာပုံထဲမှာ
ကိုယ်အိမ်တိုင်ကိုယ်ပြန်ရှာရတာတွေ
မီးကျွမ်းနေတဲ့ကိုယ့်လက်တဖက်
ကိုယ်ပြန်ကောက်သိမ်းရတာတွေ
ပြီးဆုံးကြပါစေ။
စစ်နဲ့ ငြိမ်းချမ်းရေး (၂)
- - - - - - - -- - - - - - - --
ငြိမ်းချမ်းရေးနဲ့ လက်နက်နဲ့ လဲချင်လဲကြပါ။
ငြိမ်းချမ်းရေးနဲ့ အမှန်တရားကိုတော့ မလဲကြပါနဲ့
လည်စင်းပေးမှရတဲ့ငြိမ်းချမ်းရေးဆိုတာ
မုဒိန်းသမားနဲ့ရတဲ့ဗိုက်လိုပဲ၊
တကယ့်ဘဝဆိုတာ
နေ့တိုင်းတိုက်နေရတဲ့စစ်ပွဲပဲ၊
ြိငိမ်းချမ်းရေးကို
ကြက်တူရွေးတွေရွတ်ပါစေ
ယုံကြည်ချက်ပေါ် အလံမလှဲခဲ့သူတို့သာ
ထာဂရငြိမ်းချမ်းကြပေတယ်။
နေ့တိုင်း
ငြိမ်းချမ်းရေးနေ့ဖြစ်ပါစေ။
စစ်နဲ့ငြိမ်းချမ်းရေး (၃)
- - - - - - - - - - - - - - - - -
စစ်ပွဲတွေနောက်မှာ
အကျိုးစီးပွားတွေရှိတယ်
အကျိုးစီးပွားတွေနောက်မှာ
စစ်ပွဲတွေရှိတယ်၊
အကျိုးစီးပွားကို
လူ့အသက်တွေနဲ့ပေးဝယ်နေကြတယ်
ငြိမ်းချမ်းရေးမှာအသက်မရှိဘူး။
စစ်နဲ့ ငြိမ်းချမ်းရေး (၄)
- - - - - - - - - - - - - - - -
မိဘမဲ့တဲ့ကလေးတွေကြီးလာတော့
မငြိမ်းချမ်းတဲ့လူကြီးတွေဖြစ်လာတယ်။
သူတို့မရွေးချယ်ပဲရခဲ့တဲ့ပြည်တွင်းစစ်မှာ
သူတို့အိပ်မက်တွေ ရွာလုံးက္ဈတ်ပြာကျခဲ့ရ။
သူတို့ကလေးတွေကြီးလာတော့
မိဘလည်းမဲ့ခဲ့တယ်
တိုင်းပြည်လည်းမဲ့ခဲ့တယ်။
စစ်နဲ့ငြိမ်းချမ်းရေး (၅)
- - - - - - - - -- - - - -- -
ငြိမ်းချမ်းရေးဟာ
ဘယ်နှစ်လောင်းလဲ၊
ဘယ်နှစ်ကျင်းပြည့်မှ
စာချုပ်တစောင်ရမလဲ၊
သွေးစွန်းလက်တွေနဲ့
ချိုးငှက်တွေကိုလွှတ်ကြကုန်။
- - - - -- - - - - - - - -
နှင်းခါးမိုး
၂၀၁၄
