၁။
ရဲရဲတောက်ကြတုန်းကတော့
တခြိမ်းခြိမ်းနဲ့၊
ဂျုံးဂျုံးကျတော့လည်း
ကြူကြူကိုပါလို့။
တော်ပါတော့
နိဗာနတေးတွေ
သံဝေဂလင်္ကာတွေ
တကိုယ်တော်ထွက်ပြေးရေးကဗျာတွေ
ထွက်ပေါက်မဲ့အဘိဓမ္မာတွေ။
၂။
လမ်းဆုံးပြီထင်ရင်လည်း
တိုက်ပေါ်ကခုန်ချလိုက်ကြ
ရေထဲဆင်းသေကြ၊
စိတ်ကျရောဂါကိုတော့
နောက်ဆုံးပေါ်ဖက်ရှင်လိုလို
ပွဲနေပွဲထိုင်မလုပ်ကြနဲ့။
၃။
လူသာလဲတယ်
လက်ကအလံကမလဲဘူး၊
အထကကျောင်းသူလေး
ညညတံခါးလာလာခေါက်တယ်။ ။
- - - - - - - - -
နှင်းခါးမိုး
(၈-၅-၀၇)
ခေတ်ပြိုင်...မှ
