အပြင်မှာမိုးရွာနေတယ်
အိမ်အပြင်မှာမိုးရွာနေတယ်
မိုးကတဖွဲဖွဲရွာနေတယ်
မိုးကမစဲပဲရွာနေတယ်
မိုးစက်ကျသံတဖြောက်ဖြောက်ကြားနေရတယ်
အခန်းထဲမှာမီးလင်းနေတယ်
အခန်းထဲမှာတိတ်ဆိတ်နေတယ်
အခန်းထဲမှာလူတယောက်လမ်းလျောက်နေတယ်
လမ်းလျောက်ရင်းပြတင်းပေါက်နားမှာသူရပ်တယ်
ပြတင်းပေါက်ကနေအပြင်ကိုလှမ်းငေးတယ်
အပြင်မှာမိုးရွာနေတယ်
ရွာနေတဲ့မိုးကိုသူငေးကြည့်တယ်
ငေးကြည့်နေရင်းသူတွေးတယ်
သီချင်းတပုဒ်ညည်းရကောင်းမလားသူတွေးတယ်
မိုးနဲ့ပတ်သတ်တဲ့သီချင်းတွေသူစဉ်းစားတယ်
ကဗျာတပုဒ်ရွတ်ရကောင်းမလားသူတွေးတယ်
မိုးနဲ့ပတ်သက်တဲ့ကဗျာတွေသူသတိရတယ်
မိုးစက်ကျသံတဖြောက်ဖြောက်ကပိုကျယ်လာတယ်
ဒါလည်းဂီတပဲလို့တိုးတိုးပြောမိတယ်
ဒီဂီတကပါးလျသလောက်လေးပင်တယ်
ထူထဲသလောက်တိုးဖွတယ်
ပေါ့ပါးသလောက်ဖမ်းစားတယ်
လှပသလောက်လျှို့ဝှက်တယ်
ငြိမ်သက်သလောက်စူးဝင်တယ်
ပေါက်ကွဲသလောက်တွယ်နှောင်ဖွဲ့ငင်တယ်
ဂီတထဲမှာသူနစ်မြုပ်တယ်
သူ့စိတ်ကူးအတွေးတွေနစ်မြုပ်တယ်
သူ့နှလုံးသားနစ်မြုပ်တယ်
ဂီတဟာမစဲပဲရွာနေတယ်
ဂီတဟာတဖွဲဖွဲရွာနေတယ်
ဂီတဟာသူအဇ္ဇတ္တထဲမှာရွာနေတယ်
ဂီတဟာသူ့ကိုယ်ထဲမှာရွာနေတယ်
မိုးကအပြင်မှာရွာနေတယ်။
No comments:
Post a Comment