Thursday, July 12, 2007

သေမင်းရဲ့အထက်မှာ ဘယ်သူမှမရှိ


ဈေးကွက်ဂျာနယ်ထဲက ကာတွန်းလေးတပုဒ်ကို သဘောကျမိလို့ ပြန်ဝေငှလိုက်ပါတယ်။
မြန်မာပြည်မှာ ကာတွန်းဆရာတွေနဲ့ စာဖတ်သူတွေဟာ ၀မ်းတူးရိုက်ပြီး ဂိုးဝင်အောင်သွင်းနိုင်ကြပါတယ်ဆိုတဲ့ မြန်မာကာတွန်းဆရာတဦးရဲ့စကားကိုလည်း သတိရမိတယ်။

ဒီညနေမှာ တယောက်ကလက်တို့လိုက်လို့ မမေဓာဝီရဲ့ဘလော့မှာ ရုပ်ရှင်မင်းသားဒွေးကွယ်လွန်တဲ့သတင်းကို ဦးဦးဖျားဖျား ဖတ်လိုက်ရပါတယ်။ ဘီဘီစီညဘက်အစီအစဉ်မှာလည်း နားထောင်လိုက်ရတယ်။ သတင်းနှစ်ခုက သေဆုံးပုံနဲ့ပတ်သတ်လို့ နည်းနည်းတော့ ကွဲလွဲနေတာပေါ့လေ။

မမေဓာဝီရဲ့သတင်းအဆုံးမှာ ငါသည်မုချသေရမည်၊ အချိန်ပိုင်းသာလိုတော့သည် ဆိုတဲ့ တရားဆောင်ပုဒ်ကလေးနဲ့ အဆုံးသတ်ထားပါတယ်။
ကွန်မန့်မှာ အခြားတယောက်ကတော့ အသေမဦးခင် ဥာဏ်ဦးအောင်ကြိုးစားရမယ်လို့ ၀င်ရေးသွားတာ ဖတ်ရပါတယ်။
ကျနော်ကတော့ အပေါ်ကကာတွန်းနဲ့တွဲပြီး သေမင်းရဲ့အထက်မှာဘယ်သူမှမရှိလို့ ရေးချင်မိတယ်။ သေခြင်းနဲ့ယှဉ်စဉ်းစားလိုက်ရင် ကျနော်တို့အရေးတကြီးထားတဲ့အရာတွေအားလုံးဟာ ဘာမှမဟုတ်တော့ဘူး။ အာဏာတွေ၊ ရာထူးစည်းစိမ်တွေ၊ ငါဆိုတဲ့အတ္တတွေ၊ အောင်မြင်ကျော်ကြားမှုတွေ၊ အချစ်တွေ အမုန်းတွေ ဒါတွေအားလုံး ဘာမှမဟုတ်တော့ဘူး။

နည်းနည်းလေး ဆက်စဉ်းစားကြည့်မိတယ်။
ဒီနေ့မြန်မာပြည်မှာ ဖြစ်ပေါ်နေတဲ့ပြဿနာတွေအားလုံးအတွက်ပါ။
ရှစ်လေးလုံးမတိုင်မီ လူဖြစ်နှင့်နေကြတဲ့သူတွေအားလုံး မနက်ဖြန်မှာ သေဆုံးကြရတော့မယ်ဆိုပါတော့။ အားလုံးကလည်း ငါတို့မနက်ဖြန်မိုးလင်းတာနဲ့သေကြရတော့မယ်ဆိုတာ သိနေကြပြီဆိုပါတော့။
တခုက ပြဿနာအားလုံး ဒီတညတည်းမှာတင် ပြေလည်သွားနိုင်ပါတယ်။
နောက်တခုက
ကျနော်လည်းမပြောတတ်ဘူး။ လမ်းပြမြေပုံခုနှစ်ချက်ကို တညတည်းနဲ့ န၀တက အကောင်အထည်ဖေါ်ချင်လည်း ဖေါ်သွားနိုင်တာပေါ့လေ။

သေချာတာက
အာဇာနည်ဆိုတာ သေခြင်းရဲ့အရေးကြီးပုံကို ကောင်းကောင်းနားလည်သဘောပေါက်ပြီး
သူတို့ရဲ့သေခြင်းကို လောကရဲ့အကျိုးစီးပွားနဲ့ ဆက်စပ်ပေးသွားနိုင်သူတွေ ဖြစ်တယ်ဆိုတာပါပဲ။

No comments: